Novas

O CONCELLO DE RIBADUMIA SUSPENDE A

PROGRAMACIÓN DA FESTA DO TINTO DO SALNES 2020

A medida tomouse logo de manter contactos con representantes do comercio e hostelería local, así como da Orde dos valedores do tinto e con membros da organización da festa.

            O Concello de Ribadumia informa da cancelación da Festa do Viño Tinto que se tiña previsto celebrar o primeiro fin de semana de xuño.

O equipo de goberno xunto coa comisión organizadora da Festa do Viño Tinto do Salnés e Exaltación das Variedades Autóctonas e representantes dos valedores do Viño Tinto e da Asociación de Comerciantes e Hostaleiros de Ribadumia tomaron a decisión unánime de cancelar a festa debido á situación de incerteza que se está a vivir debido á pandemia do coronavirus e ás medidas restritivas que se esperan para os vindeiros meses co obxectivo de facer fronte ao COVID-19.

Tras reunirse o 21 de abril, a decisión da anulación foi consensuada entre todos os representantes e foi considerada a máis axeitada debido, en primeiro lugar, a que nas condicións actuais non se podería garantir a seguridade para evitar posibles contaxios en actos centrais da Festa.

Por outra banda, trátase dunha Festa á que acoden milleiros de persoas e na que, debido ás restricións actuais, os asistentes non poderían desfrutar da festa coma sempre debido ás medidas de distanciamento social que impiden grandes aglomeracións e concentracións de xente.

Se ben na reunión se valorou un posible cambio de datas, desbotouse esta idea por unanimidade debido a que esta Festa perdería a súa esencia tanto pola menor afluencia de turistas coma porque non se daría cumprido a finalidade de premiar as mellores colleitas de viño do ano.

Visto todo o anterior, o Concello entende que esta decisión é a máis axeitada e esperan que se poida recuperar a normalidade o antes posible coa posibilidade de celebrar outros eventos culturais nos que se poida certificar un efectivo control da seguridade para as persoas e que si poidan acollerse as normas que vaia ditando o estado.

Esta decisión xa se comunicou igualmente ós portavoces dos demais grupos políticos municipais con representación na Corporación, así como ós demais partícipes e colaboradores dos actos principais: viticultores, catadores, empresas colaboradoras, etc.