A “XLVI Festa do Viño Tinto do Salnés e Exaltación das variedades autóctonas” quece motores.

BARRANTES CARTEL TINTO 2018Os días 1, 2 e 3 de xuño serán este ano datas sinaladas de púrpura no calendario de Ribadumia. E é que esta primeira fin de semana de xuño é a elixida para que veciños e visitantes do municipio celebren a XLVI edición da “Festa do Viño Tinto do Salnés e exaltación das Variedades Autóctonas”.

Un ano máis, Barrantes homenaxea con esta festa o apreciado caldo, coñecido en toda Galicia e fortemente ligado á tradición desta terra. Música, troula, animacións e o habitual prato de polvo á galega regado con viño tinto converterán novamente a Ribadumia no epicentro da comarca do Salnés.

Ademais, a menos de dous meses para que de comezo a XLVI edición da festa, coñecemos o novo cartel, deseñado polo artista Noya, que amosa á perfección a unión entre a música popular e o viño, unión propia desta festa. Tamén se presentou xa o bando, no que se expón toda a información sobre as catas dos viños tipo Barrantes e autóctonos.

Nesta edición, as novas tecnoloxías uniranse outra vez coa tradición, como se ven facendo dende o 2016, coa premisa de dar a coñecer a nosa festa ao redor do mundo e facilitar o acceso a toda a información sobre as actividades que se leven a cabo durante os tres días de celebración. Deste xeito, todos os interesados poderán ir coñecendo de primeira man as novas que se vaian producindo, tanto dende esta páxina web como dende o facebook e o twitter. Ademáis, terán a posibilidade de compartir as súas experiencias na festa con comentarios, fotos…

Co programa aínda por confirmar, o que é seguro é que, nesta nova edición, como nas anteriores, non faltará o bo viño, a boa comida e a boa música, que animarán a veciños e visitantes a desfrutar do municipio durante estes días.